Од 01 до 05 септември 2025 година, во Варшава, Полска, ќе се одржи првата студиска посета од почетната фаза на реализација на проектот ID:CITIZEN. Ова е прва од двете планирани посети, во градовите Варшава и Братислава, кои ќе се фокусираат на иновативни практики во областа на пристапноста, инклузивното урбано планирање и културното учество на лицата со попреченост.
Проектот ID: CITIZEN има за цел да го намали културното, општественото и архитектонското исклучување на 20% од населението – лица со попреченост од четирите земји на партнерските организации – Македонија, Полска, Словачка и Унгарија, обезбедувајќи им поквалитетен живот во поглед на општественото вклучување и учество.
Преку средби со релевантни министерства, посети во јавни институции, општествено одговорни компании и Секторот за урбанизам на Град Варшава, овој проект ќе придонесе кон модернизирање и подобрување на сегашните инклузивни практики, размена на искуства помеѓу експертите од целните области и поттикнување промени во имплементација на нови, односно ревидирање на постоечки меѓународни практики, со цел побрзи и ефикасни инклузивни решенија во дел на урбанистичко планирање и пристапност во јавни простори.
„Проектот ID:CITIZEN ќе помогне да го подигнеме јавното разбирање за инклузивноста и да обезбедиме одржливи методи и насоки за застапување на инклузивни политики и елиминирање на бариерите. Размената на искуства ќе допринесе и за зајакнување на процесите за поддршка на лицата со попреченост, во целните земји од Централна И Источна Европа.“ – изјави Ружица Стојановска, коррдинаторката од Здружението Икуалити.
Крајната цел на проектот е изготвување на сеопфатен документ „Препораки за политики за подобрена инклузивност“, кој ќе ги насочи институциите, креаторите на политики и јавните актери кон создавање поконструктивни процеси во овозможување на инклузивни средини во Централна и Источна Европа.
Проектот е реализиран во партнерска соработка на Здружението Икуалити (Македонија) со Фондација Интеграција (Полска), Здружение Тененет (Словачка) и Организација Рака под Рака (Унгарија), а се реализира со поддршка на Меѓународниот Вишеградски фонд, за поттикнување и унапредување на регионалната соработка меѓу граѓански организации, размена на искуства и промовирање на меѓусебното разбирање.
